Tapenaina e Sandra King Young
(Pago Pago, Amerika Samoa, Iuni 10, 2026)
Ua faatulagaina felafolafoa’iga i le eli’ina o le alititai o se filifiliga i le va o le avanoa tau tamaoaiga ma le puipuiga o le si’osi’omaga. Peita’i a o le i faalauiloaina sa tatou filifiliga fai faatatau i le eli’ina o le alititai, e tatau ona o tatou mua’i faafeagai ma le moni o lo o tula’i mai;
E anoanoa’i mea e le o mafai ona au iai lo tatou iloa na i lo o mea ua mafai ona o tatou mautinoina.
Tele augatausaga o su’esu’ina e Saienitisi le sami loloto, peita’i e tumau pea ona avea o se tasi o si’osi’omaga i luga o le fogaeleele e le i atoatoa iai le malamalamaaga. O lo o faaauau pea ona maua ituaiga eseese o meaola, ma o lo o fianfinau pea foi tagata sue’su’e ina ia a’oa’oina pe faapefea ona faagaoioia, faafeusua’i ma toe faaolaina mai fesoa’iga le taaviliga o le ola i totonu o le alititai.
O le mea ua o tatou iloa o se atugaluga.
O le eli’ina o le alititai o le a tafiesea mai ai ma’ama’a nini’i mai le taele o le alititai ma faaleagaina ai apitaga sa fatufatu mai le fia miliona o tausaga ua mavae. O le faagaoioiga o le eli’ina o le alititai o le a ona faatupulia mai ai se nefu e mafai ona tafea ma salalau mamao ese atu mai le nofoaga o lo o faatino ai nei gaoioiga, ma e tele le avanoa e aafia ai le saogalemu o se vaega tele o ogasami ma meaola o lo o ola ai
O le malomalo’ā, o le galulu o le eleele atoa ma ni uila e ono emo mai ona o nei gaoioiga o le a ono gaepu ai le to’afilemu o le ola o meaola uma o lo o faalagolago i ia vaega to’amalie o le si’osi’omaga.
Masalo e silli atu ona taua le mea e le o mafai ona au atu iai lo tatou iloa.
E le o mafai i le taimi nei e Vaega su’esu’e o Saienitisi ona faamatalaina atoatoa ni a’afiaga o le ola o mea uma o lo o i le si’osi’omaga o le alititai lea o le a galuea’iina. E le o mafai ona o latou iloaina auala o le a fetafea’i aga’i iai le pefu e mafua mai i nei gaoioiga, ae pe o le a faapefea fo’i ona a’afia femalagaa’iga a meaola uma, o faiga faiva atoa ai ma vaega uma o faalagolago iai le le tagata mo le fofoga taumafa, ae pe faamata fo’i e mafai ona toe faafouina vaega o le si’osi’omaga o le a faaleagaina i se taimi e talafeauga e tusa ma gaoioiga a le tagata – pe o le a le toe mafai lava ona faafo’isia i se tulaga lelei.
O le avea ai ma tagatanu’u Samoa, e tasi le mea e tatou te matua malamalama tele iai e uiga i le vasa loloa: e feavea’ia e āuma ma peau tatafe mea uma. E tatou te molimauina i taimi uma taetafe mai mea mamao e tafea atu aga’i i matafaga. Afai o le a faataapeapeina oneone nini’i ma le pefu i totonu o le sami, o lona uiga o le a fetafea’i solo i so o se vaipanoa e aga’i iai le au. E leai se tasi e mafai ona ia ta’utinoina pe o gafea o le a to’a atu iai ia vaega a o a fo’i a’afiaga tumau e ono faatula’i mai ai – peita’i e iai le avanoa e mafai ona to’a atu ai ia otaota i o tatou a’au
O le nei lagona le mautonu o le a avea o se popolega i so o se mea. Ua atili ona si’itia atugaluga ona o ogasami ua fuafuaina e faatino ai nei fuafuaga o lo o taoto tonu i gataifale ma Sone Puipuia mo le Tamaoaiga (EEZ) o Amerika Samoa, ma ua faalautele atu i le 200 maila tautai mai i o tatou talafatai taulalata ane i Motu o Manu’a ma Swain.
O nei ogasami o le foa’ialofa ae e le na o ni tositosi i luga o le faafanua. O se vagea o lo tatou faasinomaga, e mo a tatou faiga faiva, e tua iai lo tatou tamaoaiga aemaise o lo tatou lumana’i manuia. O le punao’a lea aua le fafagaina o o tatou aiga, faalagolago iai lo tatou ola tuputupu a’e, aemaise o le faatumauina lea o tala’aga na tu’ufaasolo mai e augatupulaga ua mavae atu
Ua finauina e i latou o lo o lagolagoina le eli’ina o le alititai o le a mafai e le si’itiaga o le auiluma o le tekonolosi ona faafetaia’ia atugaluga o lo o feagai nei ma lo tatou si’osi’omaga. A o ai na manatu ma faamautinoaina mai o le a mafai e se kamupani o lo o foufou mai e eli’ina gataifale o Amerika Samoa (EEZ) ona faatinoina e tusa ma aiaiga tusa lava pe ua faaalia le malu puipuia o auala faaonapo nei o le a faatino ai le galuega?
O taimi lava e faamatu’uina atu ai le ulua’i lisi, o le a le toe patino loa le mataupu i se kamupani e tasi po o se vasega o ni maliliega. Peita’i o le a taoto atu i le faavaeina o se faata’ita’iga o le a mafai ona faatulagaina mai ai le lumana’i o lo tatou gataifale aua augatupulaga fai mai.
O a’iaiga faalaua’itele e tatau ona faavae i faamaoniga, a le o ni faanaunautaiga. E le tatau foi ona i luga o tagata o Amerika Samoa le avega e tau faamaonia le tulaga lamatia e tupu mai le eli’ina o le alitita. O le avega lea e tatau ona taoto atu ia i latou o lo o faananau ma saili e eli’ina le taele o o tatou ogasami ina ia faaatagia mai – e aofia ai ma talitonuga faatuatuaina faasaienisi ma faamaoniga manino – o le a mafai ona faatinoina ma le saogalemu, mataalia, atoa ai ma le leai o ni mafatiaga e le mafai ona toe faafo’isia.
I le taimi nei, e le i mafai lava ona o latou faafetaia’ia nei atugaluga
O faamatalaga o lo o faamauina i le taimi nei – atoa ma faamatalaga o lo o tau sailia ua lava lea mo o tatou tagata aemaise o tatou ta’ita’i e filifili ai le tulaga e tatou te tutu ai. Ua lava mea ua o tatou iloaina e faailoa mai ai mafatiaga ogaoga, le loloto o le lē mautinoa, aemaise o le iai o avanoa e le mafai ai ona toe togafitia ni faafitauli e ono tula’i mai.
O faaputuga o ma’ama’a nini’i o lo o ta’atitia i le taele o lo tatou alititai e le mafai ona tafiesea. O lo latou lava lea nofoaga mau talu mai le silia ma le miliona tausaga ua tuna’i. Afai e mafai ona faaatagia mai e le poto faasaienisi i le lumana’i, e mafai ona eli’ina ma le saogalemu nei ma’ama’a, ona avanoa lea o tupulaga o le luma’i e toe asia le fesili
Peita’i o le taimi lava e ēlieseina ai, o le a mou atu e le toe vaaia
O le poto faasaienisi lea ua o tatou maua ma le poto e le i mafai ona o tatou faasopoliaina, ua lava lea e fatufatu ai se faai’uga aoaotetele. Afai e le o mautinoa ni taunu’uga ma e ono faatumauina e aunoa ma se vaifofo, ia faaete’ete ae aua le fefe
O le Atamai lena
Mo Amerika Samoa, o le a le mea ua o tatou iloa ma le mea tatou te le o iloa, ua lava lea e tatou te faapea ane ai E LEAI