Tapenaina e Sandra King Young
(Pago Pago, Amerika Samoa, Iuni 9, 2026) —
O le Eli’ina o minerale mai le alititai e le o se gaoioiga na fa’afuasei ona manu a’e i le tausaga 2025, ma tu’uina atu ai i tatou i talafatai o lisi a le feterale lea na faamatu’uina mai i totonu o Nofoaga Faapitoa mo le Tamaoaiga (EEZ) i Amerika Samoa. O atina’e e pei ona ua fofolaina mai i lenei vaitau o ni taunu’uga o aiaiga, su’esu’ega faasaienisi, auiluma faatekonolosi, faatasi ai ma le faatupulaia o manaoga mo minerale anagata a le feterale mai le tele o tausaga ua tuana’i.
O nai vaega nei e fa ua manatu e tuuina atu e fesoasoani i o tatou tagata ina ia manino lelei i le mataupu ua faatula’i mai. A o le i faia la tatou filifiliga i sa tatou gaoioiga o le a soso’o ai, e tatau lava ona o tatou mua’i malamalama pe na faapefea ona o tatou taunu’u mai i’inei, a o ai o iai le pule faataga e faia ai nei faaiuga, o le a le mea ua folasia – a o le a fo’i se mea o lo o natia – e faatatau i ni a’afiaga e ono alia’e mai, mai le eli’ina o minerale mai le alititai, a o a fo’i nisi auala o totoe e avanoa ai lo tatou puipui maluina o Amerika Samoa ma ona manaoga. Po o fea lava o taoto iai finagalo i le eli’ina o minerale mai le alititai, e tatau lava ona amata le faalauiloaina o ni faatalatalanoaga faalaua’itele i le manino lelei o le malamalama’aga i mea moni.
O le malamalama i le pe na faapefea ona o tatou taunu’u mai i le tulaga ua o tatou iai nei e taua tele ona o faaiuga ogaoga e aafia ai lo tatou lumana’i sa faia i le tele o tausaga ma ua silia fo’i ma ni auga tupulaga. O le tala faasolopito o le eli’ina o minerale mai le alititai o lo faamaite mai ai se lesona lautele: E tatau ona iai se leo o Amerika Samoa i so o se taimi e faatula’i mai ai ni aiaiga a le feterale, ae le o le faatoā lagona ina ua amata faagaoioia ia tulafono.
O le tausaga 1980 na faatulafonoina ai e le Konekeresi le Tulafono o Punao’a o Minerale mai le Loloto o le Alititai, ma faavaeina ai e le feterale se auivi mo le faasopoliaina ma le atina’eina o minerale ma punaoa mai le taele o le alititai. Tolu tausaga mulimuli ane, ona faalauiloaina ai lea e le Peresetene ia Ronald Reagan, Sone Faapitoa mo le Tamaoaiga o le Iunaite Setete, ma faalauteleina tuao’i a le feterale i luga o punaoa o le gataifale i le silia ma le 200 maila tautai mai matafaga o Amerika Samoa faapea isi teritori o le Malo tele.
O le fesili faaletuafono pe na iai se saofaga a Amerika Samoa i na faaiuga. O le avea ai o se teritori e le i tu’ufaatasia ma faatulaga lelei, e tele vaega o lo tatou sootaga ma le malo feterale na faavaeina e aunoa ma se auai tu’usa’o atu iai o o tatou tagata. O le aia tutusa o puleaga a le feterale ma puipuiga a faigamalo faalotoifale o se mataupu e tumau lona faatauaina i nei onapo.
I augatupulaga ua mavae na matua mamafa ai lava le faisaofaga o so’oupu a le feterale, itutino mo su’esu’ega, atoa ai ma pisinisi tuto’atasi i le su’esu’eina ma le faataotoina o le faafanua o le alititai o le Vasa Pasefika, ma faapito augafa i le Sone o Clarion-Clipperton. Na mafai ona maitauina ai ni faaputuga tetele o kopati, nikolo, makanisi, kopa atoa ai ma isi minerale faapitoa. E le i mamao tele atu na faamautinoa mai ai ni faaputuputuga o ma’ama’a nini’i e maua ai le ēle i totonu o nisi o vaega o Amerika Samoa EEZ, ma faatupulaia ai le faanaunautaiga aga’i i le itulagi lea a o tupuolaola le manaoga mo minerale e faaaogaina mo le fausiaina o ma’a uila, malosiaga faafouina faaonaponei, aemaise o le gaosi’ina o oloa o nei onapo.
I le tau amatamataga o le tausaga 2010, na avea ai le faasologa o le mauaina o minerale anagata o se atugaluga aiaia tau atunuu ua fusia faatasi ma faiga faatauva o le tamaoaiga atoa ai ma puipuiga tau atunuu. I le 2023 ma le 2024, na maualuga le faatalatalanoaina o le eliina o minerale mai le loloto o le alititai o se vaega o alafua a Amerika ina ia saogalemu le gafataulimaina o nei punao’a. I le tausaga 2024, na tuuina mai ai e le Kovana ia Lemanu P.S Mauga se feau e taofia ai mo se taimi lē tumau gaoioiga uma o le eliina o minerale mai le alititai i totonu o ogasami patino ia Amerika Samoa ina sei mataituina ni ona aafiaga e ono faatulai mai i le siosiomaga, le soifuaga lautele aemaise o le tamaoaiga.
Ia Iuni 2025, na faalaua’itele ai le tutula’i faatasi o Kovana Nikolao Pula, le Faipule mo le Konekeresi Amata Radewagen, le Peresitene o le Senate Tuaolo Manaia Fruean, ma le Fofoga Fetalai o le Maota Savali Talavou Ale e tete’e atu i le maliega ua faataoto mai a le BOEM mo le faagaoioiga o le eliina o minerale mai le alititai i ogasami o Amerika Samoa EEZ, e faaatagia atu ai i la latou mau o lea le finagalo o tagata o Amerika Samoa.
Mulimuli ane aloaia le faamaonia o se i’ugafono e tete’e atu ai i le eliina o le alititai, lea sa lagolago malosi ina e le Fofoga Fetalai o le Maota, Savali Talavou Ale faatasi ai ma le Faipule ia Melesio Gurr. O lea faiga na tuuina atu i le Maota i le aso 31 Iulai, 2025, ma autasi ai le Senate e faamaonia i le aso 1 Aukuso 2025. O nei gaoioiga o lo o faaatagia mai le faatupulaia o atugaluga i totonu lava o le teritori.
Peita’i, o le pule i luga o ia gaoioiga i totonu o le EEZ e faalagolago tele i le malo feterale, ma avea ai le Konekeresi, le Fale Pa’epa’e, atoa ai ma vaega so’oupu faatonutonu a le feterale o ni ulua’i malae lea o lo o faavae mai ai nei faai’uga.
I le masina o Aperila 2025, na tuuina atu ai se talosaga mai se kamupani tumaot’i mo le amataina o le faagasologa o galuega faamatu’u a le feterale i totonu o ogasami a le U.S. Mulimuli ane i le masina lava lea, na tuuina atu ai e Peresitene Trump se Poloa’iga Faapitoa 14285 e faatonutonuina ai vaega so’oupu a le feterale ina ia faanatinati le atina’e o minerale anagata i fafo atu. E le i pine, ae amata loa ona iloiloina e le Matagaluega o le Initeria, ma le Ofisa e Pulea Malosiaga mai le Sami (BOEM) avanoa e mafai ona faamatu’uina atu mo tauofoga e aofia ai ma nofoaga i totonu o Amerika Samoa EEZ. E o’o ane i le taimi na faato’a iloa ai e le to’atele o tagata nu’u le mataupu lea, peita’i ua mae’a faataoto ma ua amata faagaoioiga lona faagasologa.
O le fesili tupito e tula’i mai pea: Aisea na filifilia ai Amerika Samoa o se tasi o nofoaga ua faapito augafa iai le vaai e faagaoioia ai nei gaoioiga faanatinati, ae o le a se sao, pe afai sa iai, o le teritori i le faia o ia faaiuga? O na fesili e matua moomia ni tali manino, aemaise lava pe afai o o tatou tagata o le a mua’i tauamoina ni mafatiaga e ono faatula’i mai i le si’osi’omaga, le soifuaga lautele ma le tamaoaiga
E faigofie lava le mataupu: o le faatinoina o le eli’ina o le alititai, e le o se mataupu na faatula’i mai anapo. O faavae faatulafonoina, su’esu’ega faasaienisi, o faamanuiaga o le tamaoaiga atoa ma le faatonutonuina o lona faasologa lea na mafua ai ona o tatou taunuu mai i lea vaega sa fatufatu mai i le tele o tausaga ua tuana’i. O le malamalama lelei i le tala faasolopito o le a fesoasoani i le faamatalaina o lo tatou tulaga i nei onapo – ae pe aisea foi ua alagatatau ai ona auai atoatoa atu Amerika Samoa i le faatulagaina o laasaga ia o le a fotua’i mai
O lo o faaauauina pea le tusitusiina o le tala i le eli’ina o le alititai. O le fesili pe o le a mafai e Amerika Samoa ona saofaga sona leo i totonu o itulau o lo o mulimuli mai